Terminal nima qiladi
Face ID terminal xodimning yuzini kamera orqali taniydi va har bir o'tishni vaqt bilan birga xotirasiga yozadi. Ko'p modellar yuzdan tashqari karta, PIN-kod yoki barmoq izini ham qabul qiladi — yuzi tanilmay qolgan holatlar uchun zaxira usul bo'ladi.
Terminal eshik qulfi yoki turniketni boshqarishi mumkin: xodim tanilsa, eshik ochiladi. Shunda bir qurilma ham davomatni, ham kirishni nazorat qiladi.
Hisobot qanday olinadi
Terminallar tarmoqqa ulanadi va ma'lumotlarni kompyuter dasturiga (masalan, iVMS-4200) yuboradi. Dasturda ish jadvali kiritiladi, so'ng kechikishlar, erta ketishlar va ishlangan soatlar bo'yicha oylik jadval Excel faylida olinadi.
Filiallar ko'p bo'lsa, har biriga terminal qo'yiladi va hammasi bitta dasturga ulanadi — buxgalteriya barcha xodimlarni bir joyda ko'radi.
Modelni tanlashda nimaga qarash kerak
- Xodimlar soni: terminalning xotirasi qancha yuzni saqlay olishi xususiyatlarida ko'rsatilgan.
- O'rnatish joyi: ko'chada yoki darvozada turadigan terminal chang-namlikdan himoyalangan bo'lishi kerak.
- Kirish usullari: karta yoki QR-kod ham kerakmi — mehmonlar va vaqtinchalik ishchilar uchun qulay.
- Eshik nazorati: elektron qulf, chiqish tugmasi va quvvat bloki alohida olinadi.
O'rnatish tartibi
Terminal ko'z darajasida, yorug'lik orqa tomondan tushmaydigan joyga o'rnatiladi. Keyin xodimlar ro'yxati kiritiladi va har birining yuzi bir marta rasmga olinadi — bu odatda bir kishiga bir daqiqadan oshmaydi.